Azərbaycan Respublikasının Prezidenti İlham Əliyevin sədrliyi ilə aprelin 17-də Yevlaxda keçirilən qeyri-neft ixracatçılarının respublika müşavirəsi İDEA MMC-nin fəaliyyətinə öz müsbət təsirlərini göstərəcək. Prezident İlham Əliyevin ötən il oktyabrın 5-də "Xarici ölkələrə ixrac missiyalarının təşkilinə, xarici bazarların araşdırılması və marketinq fəaliyyətinə, "Made in Azerbaijan" brendinin xarici bazarlarda təşviqinə, yerli şirkətlərin ixracla bağlı xarici ölkələrdə sertifikat və patent almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsi hesabına ödənilən hissəsinin müəyyənləşdirilməsi və ödənilmə mexanizminin tənzimlənməsi Qaydası"nın təsdiq edilməsi haqqında imzaladığı Fərman şirkətimiz qarşısına daha böyük və uzunmüddətli beynəlxalq hədəflər qoydu. Fərmanın tərkib hissəsi olaraq İDEA MMC ölkədə İqtisadiyyat Nazirliyi və Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə 20-dən artıq biznes görüşlərdə iştirak edib, beynəlxalq şirkətlər və fərdlərlə münasibətləri möhkəmləndirməyə nail olub.

Bu barədə İDEA MMC-nin direktoru İbrahim Alısoy bildirib.

Təmsil etdiyi qurum haqqında məlumat verən şirkətin direktoru qeyd edib ki, 2004-cü ildən fəaliyyətə başlayan İDEA MMC bütün növ müasir və xüsusi dizaynlı şəhərsalma, park-bağ məhsullarının, eləcə də, özəl dizaynlı taxta və metal konstruksiyalar, infrastruktura dair memari formalar və dizayn elementlərinin istehsalı üzrə ixtisaslaşan, milli istehsalımızın inkişafı üçün xidmət göstərən Azərbaycan şirkətidir. Bir sıra yerli və beynəlxalq şirkətlərlə uğurlu layihələrə imza atan İDEA-nın hazırda Rusiya Federasiyası, Qazaxıstan Respublikası, Qətər Dövləti və İran İslam Respublikasında rəsmi nümayəndəlikləri fəaliyyət göstərir.

"Hazırda nümayəndəmiz Qazaxıstan Respublikasına təşkil olunan ixrac missiyası səfərindədir. Ötən il Qətərə ixrac missiyası çərçivəsində bu ölkənin Bələdiyyə və Ətraf Mühit Nazirliyində görüş keçirilib, "Scandinavian Supplies" şirkəti ilə rəsmi əməkdaşlıq haqqında müqavilə imzalanıb. Müqaviləyə əsasən, şirkət İDEA məhsullarının Qətərdə satışı və təqdimatı hüququnu qazanıb. Əməkdaşlığın ilk addımları olaraq, İDEA bu ilin martında Qətərdə keçirilən "AGRİTEQ 2017" sərgisinə Qətərin Bələdiyyə və Ətraf Mühit Nazirliyi tərəfindən dəvət alıb, sərgi üçün və nazirliyin xüsusi sifarişi əsasında ixrac həyata keçirib. May ayında Qətərdə keçiriləcək "PROJECT QATAR" sərgisi üçün məhsullar göndərilib, Qətərin Bələdiyyə və Ətraf Mühit Nazirliyi, eyni zamanda digər şirkətlər tərəfindən göndərilən təkliflər üzərində iş aparılır", - deyə İ.Alısoy diqqətə çatdırıb.

Şirkət 2015-ci ildə Rusiyaya, 2016-cı ildə isə Qazaxıstana, Qətərə və Almaniyaya ixrac missiyasını həyata keçirib.

Hazırda şirkət Rusiyanın "CROCUS GROUP" şirkətinə 5 ədəd iri avtomaşın olmaqla Azərbaycan istehsalı olan bağ mebel məhsulları ixrac edir. Ötən həftə isə şirkətimizlə İran İslam Respublikasının "Arabbeh Parvaz Pars Business Group" şirkəti ilə rəsmi nümayəndəlik haqqında müqavilə imzalanıb. Müqaviləyə görə, şirkət İDEA məhsullarının İran ərazisində satış və təqdimat hüququnu qazanır.

Ümumilikdə, beynəlxalq əlaqələrin və ixrac potensialının inkişafı istiqamətində AZPROMO, İqtisadiyyat Nazirliyi, Dövlət Gömrük Komitəsi və digər bütün əlaqədar təşkilatlar bizə yaxından dəstək göstərir.

İ.Alısoy vurğulayıb ki, dövlətimizin başçısının mütəmadi olaraq ixrac potensialını və şirkətlərin bu istiqamətdə fəaliyyətini diqqət mərkəzində saxlaması və qayğı göstərməsi inanırıq ki, çox qısa bir zamanda şirkətimizin dünyanın bir çox ölkələrində yaxından tanınmasına səbəb olacaq və bu da birbaşa milli iqtisadiyyatımızın inkişafı üçün zəmin yaradacaq. Bu istiqamətdə biz Azərbaycan şirkəti olaraq bütün imkanlarımızdan istifadə etməyə hazırıq.