Xəbər verildiyi kimi, Birləşmiş Ərəb Əmirliklərinin mərhum qurucusu Şeyx Zayed bin Sultan Əl Nəhyanın həyat yoldaşı, öz nəcib əməlləri ilə “Millətin anası” adına layiq görülmüş Şeyxə Fatimə bint Mübarəkin, həmçinin onun rəhbərlik etdiyi Baş Qadın Federasiyasının təşəbbüsü ilə martın 15-25-də “Xeyirxah ananın xeyirxahlığı” adlı festival keçirilib.

Festival çərçivəsində təşkil edilmiş mədəniyyət gecəsində Azərbaycan səfirliyi və icmamızın üzvləri fəal iştirak ediblər. Gecədə ölkəmizin milli rəqsləri, o cümlədən musiqi xəzinəmizin “Yallı”, “Sarı gəlin” kimi nümunələri ifa edilib.

Festival başa çatandan sonra səfir Daşqın Şikarovun həyat yoldaşı Ülviyyə Şikarova və digər ölkələrin səfir xanımları Şeyxə Fatimə bint Mübarək tərəfindən qəbul ediliblər. Şeyxə Fatimə bu cür festivalda Azərbaycanın ilk dəfə təmsil olunduğunu yüksək qiymətləndirərək belə fəallığın davam edəcəyinə ümidvar olduğunu söyləyib. O, eyni zamanda, Azərbaycan mədəniyyətinin və musiqisinin zənginliyinə bələd olduğunu qeyd edərək mədəniyyət gecəsində təqdim olunmuş milli rəqslərimizin həm onu, həm də bütün auditoriyanı heyran etdiyini vurğulayıb.

Ü.Şikarova geniş auditoriyanı zəngin Azərbaycan mədəniyyəti və musiqisi ilə tanış etmək imkanı yaratdığına görə Şeyxə Fatiməyə səfirliyin kollektivi və Azərbaycan icmasının üzvləri adından təşəkkürünü ifadə edib. O, bu cür tədbirlərdə Azərbaycanın bundan sonra da fəal iştirak edəcəyini vurğulayıb. Görüşdə Azərbaycan mədəniyyəti və musiqisinin, zəngin mədəni irsimizin təbliği işində Birinci vitse-prezident, Heydər Əliyev Fondunun prezidenti Mehriban Əliyevanın və Fondun vitse-prezidenti Leyla Əliyevanın dəyərli fəaliyyəti barədə ətraflı məlumat verilib. Fondun xətti ilə dünyanın aparıcı paytaxtlarında Azərbaycan mədəniyyəti gecələrinin keçirildiyi, mötəbər beynəlxalq tədbirlərdə qurulan Azərbaycan pavilyonlarında milli musiqilərimizin və rəqslərimizin ifa olunduğu diqqətə çatdırılıb.

“Xeyirxah ananın xeyirxahlığı” festivalında Azərbaycan səfirliyi xüsusi fərqləndiyi üçün Şeyxə Fatimə bint Mübarək tərəfindən fəxri diplomla və mükafatla təltif olunub.