• flag
  • Polkovnik Şair Ramaldanov: Bu gün Azərbaycan ən müasir silahları ala bilmək iqtidarındadır

     

     

    MDB ölkələri institutunun direktor müavini Vladimir Yevseyevin “Lazarev klubu”nun ilk iclasındakı çıxışında səsləndirdikləri nə hərbi mütəxəssisə, nə də siyasətçiyə layiq rəy deyil. Onun məsələləri düzgün təhlil etmək üçün kifayət qədər hərbi savadı da yoxdur. Görünür, o, hər hansı bir sifarişi yerinə yetirir. Bu, onun sırf ermənipərəst mövqedə olduğunu göstərir. Bunu yeni yaradılmış “Lazarev klubu”nun Rusiya və Ermənistanın siyasi dairələrinin nümayəndələrinin iştirakı ilə İrəvanda keçirilən ilk iclasında MDB ölkələri institutunun direktor müavini Vladimir Yevseyevin çıxışı zamanı səsləndirdiyi fikirləri AZƏRTAC-a şərh edən ehtiyatda olan polkovnik Şair Ramaldanov bildirib. Ş.Ramaldanov deyib ki, bütün bunlar diqqəti Ermənistandakı hazırkı durumdan, bu ölkənin daxili problemlərindən yayındırmağa hesablanıb. Çünki Ermənistanın indiki rəhbərliyi sırf Rusiya yox, qərbyönümlü siyasət yürütməyə meyillidir. Rusiya ilə Ermənistan arasında müəyyən soyuqluq yaranıb. Artıq Ermənistanda hər hansı bir rəhbərin fikirləri cəmiyyətdə ciddi qəbul olunmur. Yalan vədlər çoxdur. Ona görə Vladimir Yevseyev vəziyyəti müəyyən dərəcədə sabitləşdirmək və Rusiyanın maraqlarını Ermənistanda göstərmək üçün bu addımı atıb. Bu addımın təşkilatçıları da, iştirakçıları da Rusiyada yaşayan ermənilər və ermənipərəst şəxslərdir. Ona görə də Vladimir Yevseyevin səsləndirdiyi fikirlər, ilk növbədə, daxili auditoriyaya hesablanıb. Məqsəd Ermənistanın qərbə və ABŞ-a yönəlmiş istiqamətini müəyyən dərəcədə dəyişdirməkdir. “Deyə bilərəm ki, Ermənistan Rusiya olmadan heç nə edə bilməz. Ermənistan heç vaxt müstəqil olmayıb. Bu ölkənin nə müstəqil siyasəti olub, nə də rəhbərləri öz fikirlərində heç vaxtı müstəqil olmayıblar. Onlar ancaq sifariş yerinə yetirirlər və ona görə də acınacaqlı vəziyyətdədirlər. Vladimir Yevseyev “İsgəndər” raketləri və onların imkanları barədə rəy söyləyəcək qədər peşəkar hərbçi deyil. Bir-iki ədəd “İsgəndər” əməliyyat-taktiki raket kompleksinə sahib olan Ermənistan silahlı qüvvələrini bu gün Azərbaycan Ordusu ilə müqayisə etməyin özü savadsızlıqdır. Azərbaycan Silahlı Qüvvələri bu gün dünyada ən güclü 50 ordu sırasındadır. Bu, ən nüfuzlu statistik qurumların verdiyi qiymətdir və Ermənistanın “İsgəndər” raketlərini əldə etməsindən sonra açıqlanıb. Ermənistan isə bu göstərici üzrə sonuncu yerlərdədir. Vladimir Yevseyev bilməlidir ki, Silahlı Qüvvələrin gücü və qüdrəti “İsgəndər”lərlə ölçülmür. Digər tərəfdən, “İsgəndər”lərin Ermənistana məxsus olub-olmaması da sual altındadır. Biz onları ancaq paradda gördük və heç bir təlimdə bu raketləri görə bilmədik”, - deyə ehtiyatda olan polkovnik bildirib. Ş.Ramaldanov qeyd edib ki, bu gün Azərbaycanın Belarusdan aldığı “Polonez” sistemləri “İsgəndər” raketlərindən nəinki geri qalmır, hətta bəzi parametrlərdə onları böyük fərqlə üstələyir. Ona görə mövcud pariteti bu formada qiymətləndirməyin özü də savadsızlıqdır. “Polonez”lər yeni tipli silahdır. Raket paritetini nəzərə alsaq və Azərbaycanın bu tipli silahlarını Ermənistandakılarla müqayisə etsək, deyə bilərik ki, ölkəmiz düşməndən ən azı 8-9 dəfə üstündür. “Biz “İsgəndər”lərə qarşı ən müasir hava hücumundan müdafiə sistemləri almışıq. Bu sistemlər artıq Azərbaycandadır. Əgər Ermənistanın “İsgəndər”ləri varsa, Azərbaycanın da “Polonez”ləri və hava hücumundan müasir müdafiə sistemləri var. Bu, düşmənin Azərbaycanın hava məkanına zərbə endirmək imkanlarını sıfıra endirir. Azərbaycanın iqtisadi potensialı, hərbi büdcəsi bu gün ən müasir silahları ala bilməyimizə imkan verir. Ermənistan isə silahlanmanı ancaq kredit yolu ilə həyata keçirməyə ümid edir. Ermənistan müdafiə nazirinin dediyinə görə, bu ölkə may ayından bəri silah ala bilmir. Çünki ölkədə ciddi maliyyə problemləri mövcuddur. Bu silahların kredit yolu ilə alınması üçün hələ də danışıqlar aparılır və bunun necə nəticələnəcəyini zaman göstərəcək. Əgər bu gün Ermənistanın birinci şəxsi əsgərlərinin alt paltarlarının olmamasından narahatdırsa, bu, düşmən ordusunun durumunun acınacaqlı olduğunu göstərir. Belə vəziyyətdə olan bir ordu nə bu gün, nə də gələcəkdə öz arsenalını Azərbaycan kimi yeni və müasir silahlarla təchiz edə bilməz”.

    2018-12-04 / 11:45
    AZERBAIJAN REALITIES MULTIMEDIA
    VALYUTA MƏZƏNNƏLƏRİ
    $ USD 1.7000
    EUR 1.9349