• flag
  • Azərbaycan Heydər Əliyev Fondunun dəstəyi ilə Beynəlxalq Memarlar İttifaqının konqresində təmsil olunub

    15051951021835751503_1000x669

    Seulda Beynəlxalq Memarlar İttifaqının (BMİ) növbəti konqresi keçirilib. Memarlıq sahəsində ən böyük beynəlxalq tədbir hesab olunan konqresdə 124 ölkəni təmsil edən 10 mindən çox iştirakçı, o cümlədən memar, hökumət rəsmiləri, elm adamları, tələbələr iştirak edib. “Memarlıq olimpiadası” adlanan konqresin təşkilatçısı Beynəlxalq Memarlar İttifaqı, Seul bələdiyyəsi və Koreya Memarlar İnstitutları Federasiyasıdır.

    Azərbaycan konqresdə geniş nümayəndə heyəti ilə iştirak edib. Nümayəndə heyətinin tərkibinə Azərbaycan Respublikasının Birinci vitse-prezidentinin köməkçisi, Heydər Əliyev Fondunun icraçı direktoru Anar Ələkbərov, Azərbaycanın Koreya Respublikasındakı fövqəladə və səlahiyyətli səfiri Rəmzi Teymurov və Azərbaycan Memarlar İttifaqının sədri Elbay Qasımzadə, memarlar daxil olub.

    Üç ildən bir təşkil olunan BMİ-nin konqresləri çərçivəsində müxtəlif tədbirlər – sərgilər, simpoziumlar, seminarlar, müsabiqələr, konfranslar keçirilib. Bundan başqa, BMİ-nin ali orqanı olan Baş Məclisin iclaslarında qurumun rəhbər şəxsləri seçilib, hesabatlar dinlənilib.

    Sentyabrın 10-da Beynəlxalq Memarlar İttifaqının Baş Məclisi çərçivəsində Azərbaycana həsr olunan təqdimat keçirilib.

    Birinci vitse-prezidentin köməkçisi, Heydər Əliyev Fondunun icraçı direktoru Anar Ələkbərov gənc müstəqil ölkə olan Azərbaycanın müxtəlif sahələrdə əldə etdiyi uğurlardan danışıb, beynəlxalq aləmdə artan nüfuzu sayəsində respublikamızın dünyada etibarlı tərəfdaş kimi qəbul olunduğunu bildirib. O, Şərq və Qərb mədəniyyətinin qovuşduğu Azərbaycanda tarixən tolerantlıq və multikulturalizm ənənələrinin hökm sürdüyünü diqqətə çatdırıb.

    A.Ələkbərov Azərbaycanın son illər bir çox beynəlxalq tədbirlərə, idman yarışlarına, mədəni və humanitar forumlara yüksək səviyyədə ev sahibliyi etdiyini bildirib, beynəlxalq ictimaiyyətin ölkəmizin təşkilatçılıq qabiliyyətini yüksək qiymətləndirdiyini diqqətə çatdırıb.

    Birinci vitse-prezidentin köməkçisi Azərbaycanın gələcəkdə Beynəlxalq Memarlar İttifaqının konqreslərini təşkil etməyə hazır olduğunu bildirib.

    Azərbaycan Memarlar İttifaqının sədri Elbay Qasımzadə ölkəmizin memarlıq ənənələrindən, son illər inşa olunan və memarlıq nöqteyi-nəzərindən diqqət cəlb edən binalardan danışıb. O, rəhbərlik etdiyi qurumun Beynəlxalq Memarlar İttifaqının işində fəal iştirak etdiyini, Bakıda memarlıq sahəsində təşkil olunan beynəlxalq əhəmiyyətli tədbirləri, müsabiqə və festivalları xatırladıb.

    Qeyd edək ki, Seul toplantısında Baş Məclisin qərarı ilə Azərbaycan Memarlar İttifaqının sədri Elbay Qasımzadə Beynəlxalq Memarlar İttifaqının Büro üzvü seçilib.

    Sonra Azərbaycanın tarixi, təbiət gözəllikləri, mədəni irsi, tarixi və müasir memarlıq abidələrinə dair film nümayiş etdirilib.

    Konqres çərçivəsində keçirilən sərgidə Heydər Əliyev Fondunun dəstəyi ilə “Bakı Şərq və Qərb memarlığının kəsişməsində” adlı geniş guşə və pavilyon fəaliyyət göstərib.

    Pavilyon və guşədə Azərbaycan tarixini, mədəniyyətini, incəsənətini, memarlığını, ədəbiyyatını, turizm imkanlarını təbliğ edən vəsaitlər, o cümlədən müxtəlif nəşrlər, xalça və milli geyim nümunələri, musiqi alətləri, Bakının tarixi və müasir memarlıq abidələrinin maketi, əl işləri, milli ornamentli suvenirlər nümayiş olunub. Bundan başqa ölkəmizə, onun tarixinə, görməli yerlərinə, müasir inkişafına, mədəniyyətinə, memarlığına, Azərbaycanda təşkil olunmuş beynəlxalq tədbirlərə, Birinci vitse-prezident Mehriban Əliyevanın və Heydər Əliyev Fondunun ölkəmizdə və xaricdə Azərbaycan mədəniyyətinin tanıdılması istiqamətində keçirdiyi tədbirlərə, Azərbaycanın tolerant və multikultural dəyərlərinə aid videoçarxlar təqdim olunub.

    Konqres çərçivəsində, həmçinin Heydər Əliyev Fondunun dəstəyi ilə Azərbaycan Memarlar İttifaqı və Azərbaycanın Koreya Respublikasındakı səfirliyi tərəfindən “Azərbaycan gecəsi” keçirilib. Gecədə Azərbaycanın tarixi və müasir memarlıq nümunələrini, Azərbaycanın təbiət gözəlliklərini əks etdirən fotosərgi təşkil olunub, habelə qonaqlara Heydər Əliyev Fondunun Azərbaycan haqqında müxtəlif nəşrləri təqdim edilib.

    Beynəlxalq Memarlar İttifaqının rəhbər şəxslərinin, üzv ölkələrin nümayəndə heyətlərinin, diplomatik korpusun və yerli ictimaiyyət nümayəndələrinin təmsil olunduğu mərasimdə çıxış edən səfir Rəmzi Teymurov Azərbaycanın müasir dövrdə Prezident İlham Əliyevin rəhbərliyi altında uğurlu inkişafından söz açıb. Diplomat Birinci vitse-prezident Mehriban Əliyevanın Azərbaycan mədəniyyətinin dünyada tanıdılması və təbliği sahəsində gördüyü işlər barədə məlumat verib, onun rəhbərlik etdiyi Heydər Əliyev Fondunun ölkəmizdə və xaricdə həyata keçirdiyi layihə və tədbirlərin əhəmiyyətini qeyd edib.

    Beynəlxalq Memarlar İttifaqının vitse-prezidenti Heydər Əli Azərbaycan ilə bağlı təəssüratlarını bölüşərək, ölkəmizin qədim və zəngin mədəniyyətə sahib olduğunu deyib. O, Azərbaycanda şahidi olduğu inkişafı, ölkə rəhbərliyinin mədəniyyətin qorunması və inkişafına göstərdiyi diqqəti yüksək qiymətləndirib.

    “Azərbaycan gecəsi”ndə “Mirvari” rəqs ansamblının üzvlərinin, tarzən Şəhriyar İmanov və onun qrupunun ifasında milli rəqslərimiz, Azərbaycan etno-caz musiqisindən ibarət konsert proqramı təqdim olunub. Azərbaycan musiqisinin valehedici təsirinə düşən qonaqlar rəqqaslarımızla birgə “Yallı” gediblər.

    Rəsmi qəbulda Azərbaycan mətbəxinin təamları da təqdim olunub.

     

    2017-09-12 / 10:07
    AZERBAIJAN REALITIES MULTIMEDIA
    VALYUTA MƏZƏNNƏLƏRİ
    $ USD 1.7002
    EUR 2.0070